歡迎大家收睇鮮奶警訊,以下為大家報導一則羅湖口岸嘅騙案。
一名化名雨田女圭嘅男子,近日因為工作要香港深圳兩邊走而冇時間寫Blog。禽日,雨田女圭响深圳回港時,如常喺羅湖口岸填寫緊健康伸報表。當佢一路填緊表嘅時候,發現身邊有兩名男子一直注視住佢,相信係想等佢填完表之後問佢借筆之類。未幾,其中一名男子開聲喇:
「唔好意思,先生,我哋係香港人,唔係騙徒嚟嘅,我哋真係唔見晒D錢,想問你借錢返香港呀。」男子出示香港身份証給雨田女圭看。
雨田女圭一言不發,只係向兩名男子做咗哩個動作---
,然後繼續埋首填寫表格。此時,兩名男子竟開始互相吐糟...
「頂!依家點算呀?」
「唏~~~一講到錢人哋就梗係以為我哋想呃錢架啦!」
「超!一個二個都驚死畀人呃咁,填乜銀嘢健康伸報表吖!鬼唔望佢哋全部中銀晒豬流感呀!!」
兩名男子嘅對話講到大大聲,好明顯係專登做臺戲畀雨田女圭睇,但雨田女圭唔中激漲法嘅計,一於左耳入右耳出,睬佢兩個都儍!填好表格後就斯斯然行去過關。
哩兩名男子如果真係唔見咗錢,點解唔盡快報警求助呢?
如果真係想向人求助嘅話,又點會猛咁詛咒人嘅呢?
咁得閒企响羅湖口岸詛咒人,點解又唔打個電話揾親友嚟救佢哋呢?
